Культурна-гуманітарнае супрацоўніцтва

Развіццё двухбаковага супрацоўніцтва ў гуманітарнай сферы заўсёды з'яўлялася важнай складовай часткай беларуска-чэшскіх адносін. Традыцыйна актыўныя сувязі падтрымліваюцца паміж дзвюма краінамі ў галіне культуры, адукацыі, у навукова-тэхнічнай сферы, па лініі спартыўных федэрацый і арганізацый.

У галіне культуры была дасягнута дамоўленасць аб прыярытэтным развіцці прыкладнога супрацоўніцтва паміж структурнымі арганізацыямі міністэрстваў культуры дзвюх краін (музеі, тэатры, галерэі і г. д.), бакі рэалізавалі шматлікія сумесныя праекты. 

Дзейнічалі мемарандумы аб супрацоўніцтве паміж Нацыянальным акадэмічным Вялікім тэатрам оперы і балета Беларусі, Нацыянальным тэатрам Брно і Дзяржаўнай операй Прагі, пагадненне аб супрацоўніцтве паміж Беларускай дзяржаўнай акадэміяй мастацтваў і Акадэміяй мастацтваў у г. Празе.

Чэшскія выканаўцы прымалі ўдзел у гала-канцэртах і конкурсах у рамках Міжнароднага фестывалю мастацтваў «Славянскі базар у Віцебску», юныя прадстаўнікі Чэхіі таксама прымалі ўдзел у беларускіх моладзевых і дзіцячых эстрадных і музычных конкурсах. У 2016 годзе ў адрас удзельнікаў і гасцей фестывалю «Славянскі базар у Віцебску» было накіравана віншавальнае пасланне ад імя Прэзідэнта Чэхіі М. Земана.

Штогод на Мінскім міжнародным кінафестывалі «Лістапад» былі прадстаўлены фільмы Чэшскай Рэспублікі. Акрамя таго, прадстаўнікі Чэхіі прымалі ўдзел у складзе журы конкурсу фільмаў для дзіцячай і юнацкай аўдыторыі «Лістападзік». 

Партнёрскія адносіны ў галіне міжнароднага дакументаабмену звязалі Нацыянальную бібліятэку Беларусі з Нацыянальнай бібліятэкай Чэхіі, Славянскай бібліятэкай пры Нацыянальнай бібліятэцы Чэхіі і Масарікавым Універсітэтам у г. Брно. У 2009 годзе Нацыянальная бібліятэка Беларусі далучылася да праекту Manuscriptorium, ініцыяванага Нацыянальнай бібліятэкай Чэшскай Рэспублікі.

У 2016 годзе Чэхія перадала Нацыянальнай бібліятэцы Беларусі фотакопіі ў высокім раздзяленні, прыдатныя для вырабу факсімільных рэпрадукцый «Кнігі Ісуса Сірахава» і «Кнігі суддзяў», выдадзеных у г. Празе Ф. Скарынам. 

У 2017 годзе сумесна з Нацыянальнай бібліятэкай Беларусі і Нацыянальнай бібліятэкай Чэхіі рэалізаваны праект «Францыск Скарына – беларускі і ўсходнеславянскі першадрукар», прысвечаны 500-гадоваму юбілею першай усходнеславянскай друкаванай кнігі, выпушчанай беларускім першадрукаром.

У рамках праекта разам з іншымі мерапрыемствамі адбыўся абмен электроннымі копіямі выданняў Ф. Скарыны, якія знаходзяцца ў архівах бібліятэк дзвюх краін, з наступным уключэннем у адзіную калекцыю захавалых асобнікаў кніг і рукапісаў Ф. Скарыны. 

Беларускія ВНУ актыўна супрацоўнічалі з вядучымі навучальнымі ўстановамі Чэхіі: Карлаў універсітэт у Празе; Вышэйшая школа эканомікі (г. Прага); Пражскі тэхнічны універсітэт; Остраўскі універсітэт; Універсітэт г. Усці-над-Лабем; Паўднёва-Мараўскі універсітэт (г. Тржебіч).

З беларускага боку актыўнасць традыцыйна праяўляюць Беларускі дзяржаўны універсітэт (г. Мінск), Беларускі дзяржаўны эканамічны універсітэт – БДЭУ (г. Мінск), Гомельскі дзяржаўны універсітэт імя Ф. Скарыны, Беларускі дзяржаўны універсітэт транспарту (г. Гомель); Брэсцкі дзяржаўны педагагічны універсітэт і інш.

Станоўча на супрацоўніцтве ў сферы адукацыі адбівалася і пашырэнне рэгіянальнага супрацоўніцтва. Так, у верасні 2016 года ў г. Ракоўнік (Цэнтральна-Чэшскі край – партнёр Гродзенскай вобласці) падпісаны Дагавор аб супрацоўніцтве паміж ПУА «Гродзенскі каледж бізнесу і права» і Акадэміяй бізнесу ім.Т.Г. Масарыка.

У 2021 годзе юныя мастакі з Беларусі сталі прызёрамі 49-й Міжнароднай выставы дзіцячай творчасці Лідзіцы 2021 на тэму «РОБАТ і штучны інтэлект». 21 удзельнік з нашай краіны быў адзначаны Ганаровым згадваннем, былі таксама ўзнагароджаны 16 беларускіх школ і мастацкіх студый.

У цяперашні час супрацоўніцтва Рэспублікі Беларусь з Чэшскай Рэспублікай у культурнай і гуманітарнай сферах прыпынена.